ආණ්ඩුව පළාත් සභා මැතිවරණය කල් දමා ගැනීමේ උත්සහයක- CAFE සංවිධානය

2/3 ක පාර්ලිමේන්තු බහුතරයකින් 20 වන ව්‍යවස්ථා සංශෝධනය සම්මත කළ හැකි යැයි ගෙනෙන තර්කය බලය බෙදීමට මාරාන්තික වනු ඇති බව කැෆේ සංවිධානයේ විධායක අධ්‍යක්ෂ කීර්ති තෙන්නකෝන් මහතා පවසයි.

නිවේදනයක් නිකුත් කරමින් ඒ මහතා මේ බව පෙන්වා දී තිබේ.

එය මෙසේය,

පාර්ලිමේන්තුවේ 2/3 කට ’13 වන ව්‍යවස්ථා සංශෝධනය ස්ථාපනය කළ ‘පළාත් සභා ක්‍ර‍මය‘ අහෝසි කළ හැකි ද?

පළාත් සභා ඡන්දය කල් දමා ගැනීමට උත්සහ කරන යහපාලන රජයේ නීති විශාරදයින් ගේ තර්කය ‘බලයා බෙදා හැරීමට‘ මාරාන්තිකය. ‘බලය බෙදීමේ සංකල්පයට‘ විනාශ කර දමා, පළාත් සභා ක්‍ර‍මය අහෝසි කර කොළඹ ආණ්ඩුවට බලය කේන්ද්‍ර‍ගත වූ පාලනයක් ඇති කිරීමේ පළමු පියවර වනු ඇතැයි ‘2/3 පාර්ලිමේන්තු බලයකින් පමණක්‘ 20 වන ව්‍යවස්ථා සංශෝධනය සම්මත කර ගැනීම යැයි කැෆේ සංවිධානයේ විධායක අධ්‍යක්ෂ කීර්ති තෙන්නකෝන් මහතා පවසයි.

ආණ්ඩුව පළාත් සභා මැතිවරණය කල් දමා ගැනීමට ජනමත විචාරණයකට මුහුණ නොදී සිටීම සදහා සරළ තර්කයක් ගොඩ නගා ඇත.

පාර්ලිමේන්තුවේ 2/3 කට පළාත් සභා ස්ථාපනය කළේය!
පාර්ලිමේන්තුවේ 2/3 කට පළාත් සභා සංශෝධනය කළ හැකිය!!
එසේ නම්, දියවන්නා පාර්ලිමේන්තුවේ 2/3 කට පළාත් සභා අහෝසි කළ හැකිය!!!

පාළාත් සභා ක්‍ර‍මය එක කඩු පහරින් ගෙල සිදින ක්‍ර‍මයක් එහි නිර්මාතෘවරුන් විසින්ම සොයා ගෙන ඇත.  නුදුරු අනාගතයේම එය ‘බලය බෙදීම විරෝධී කණ්ඩායමේ‘ සහ අධිරාජ්‍ය විරෝධීන්ගේ, කහ සිවුරු, ජිනීවා විරෝධීන්ගේ ඡන්ද මැෂිම තර කරන සටන් පාඨය බවට පත් වනු ඇත.

පළාත් සභා අති කළේ ඇයි?

නිදහසටත් පෙර සිට මේ රටට අවශ්‍ය වූ බලය බෙදාහැරීම පිළිබඳ සංකල්පය ප්‍රායෝගිකව ක්‍රියාත්මක කිරීම සඳහා පළාත් සභා ඇති විය.  සංකල්පීය, ප්‍ර‍ජාතන්ත්‍ර‍වාදී, අවිහිංසාවාදී, කැරළිකාරි, ත්‍ර‍ස්තවාදී මාවත් දිගේ පළාත් සභා ක්‍ර‍මය ගමන් කොට ඇත. ලක්ෂයකට වැඩි පිරිසක් උතුරේ සිට දකුණට පළාත් සභාවට පක්ෂ-විපක්ෂ ලෙස දිවි පුදා ඇත.  එදා පළාත් සභා ක්‍ර‍මයට පක්ෂ වූවෝ ද, ඡන්දය දැමූ මිනිසුන් මරා දැමූ උදවිය ද අද පළාත් සභා ක්‍ර‍මය පිළිගනී.  එය නියෝජනය කරයි. හැකි පළමු අවස්ථාවේ දී ම පළාත් සභා ක්‍ර‍මය විනාශ කිරීමට උපක්‍ර‍ම, මාවත් සොයමින් සිටී.

20 වන ව්‍යවස්ථා සංශෝධනය පාර්ලිමේන්තුවේ 2/3 ක බහුතරය බලයකින් සම්මත කළ හැකි යැයි කියන උදවිය ඒ සඳහා අධිකරණයට ඉදිරිපත් කරන තර්කය සරළය.  පළාත් සභා ඇති කළ ක්‍ර‍මයට, එය සංශෝධන කර බලය ‘පාර්ලිමේන්තුවට‘ ගත හැකි බවයි.

එසේ නම්, පාර්ලිමේන්තු 2/3 කට නිශ්චිත ලෙසම පළාත් සභා ක්‍ර‍මය අහෝසි කළ හැකිය!

මරණය අතින්ගෙන පළාත් සභා මැතිවරණ ව්‍යාපාරය කළ හිටපු ජනාධිපති චන්ද්‍රිකා කුමාරතුංග මහත්මියට හෝ රාජිත සේනාරත්න අමාත්‍යවරයාට මෙයට එකග විය හැකි ද? ඩිලාන් පෙරේරා හෝ සාලින්ද දිසානායක ට මෙයට පාර්ලිමේන්තුවේ අත එසවිය හැකිද?  පළාත් සභාවෙන් දේශපාලනය පටන් ගත් ලක්මන් යාපා අබේවර්ධන, වජිර අබේවර්ධන, මහින්ද සමරසිංහ හෘර්ද සාක්ෂියට අනුව ඡන්දය දිය හැකිද? තම දේශපාලන ගමනේ පඩි පෙළ බවට පළාත් සභා පත් කර ගත් සුසිල් ප්‍රේමජයන්ත ට, අරුන්දික ප්‍ර‍නාන්දු, ඩුලිප් විජේසේකර, නිශාන්ත මුතුහෙට්ටිගම වැනි ආණ්ඩුවේ අමාත්‍යවරුන්ට කිසිවෙකුට පළාත් සභා ක්‍ර‍මය ‘පාර්ලිමේන්තුවේ 2/3 ක බහුතරයකින් අහෝසි කිරීම සඳහා නෛතික පදනම සපයන පනතකට පක්ෂය ඡන්දය දිය නොහැකිය.

අනෙක් අතට, මේ පනතට විරුද්ධව පාර්ලිමේන්තුවේ අත ඔසවා ආණ්ඩුවෙන් ඉවත්වීමට සුසිල් ප්‍රේමජයන්ත, අරුන්දික, ඩුලිප් (හා සුසන්ත පුංචිනිලමේ) වැනි අමාත්‍යවරුන්ට ස්වර්ණමය මාවතක් සකස් වී වී ඇත.

බලය බෙදීම පිළිබඳ හැමදාම කථා කරන මනෝ ගනේෂන්, පී.දිගම්බරම්, රවුෆ් හකීම්, රිෂාක් බදුර්දීන් මුහුණ දෙන්නේ උගතෝකෝටිකයකටය.  පාර්ලිමේන්තු මැතිවරණයේ දී හිටපු අමාත්‍ය  අතාවුල්ලා ට හා ඔහු නියෝජනය කළ ජන කොටසට අත්වූ ඉරණම ඔවුන් දන්නා බැවින් පළාත් සභා ක්‍ර‍මය අහෝසි කිරීමට තාර්කික නීති පදනමක් සපයන කිසිඳු යෝජනාවකට ඔවුන්ට ඡන්දය දීමට නොහැකිය.

මනෝ, දිගම්බරම්, හකීම්, බදුර්දීන්ට තම අමත්‍ය ධුරයට වඩා තම ජනතාවගේ නියෝජනය පළාත් සභාවේ පවත්වා ගැනීම වැදගත් වනු ඇත.

ද්‍ර‍විඩ ජාතික සන්ධානයට අවශ්‍ය නම් 2/3 ක පාර්ලිමේන්තු බහුතරයකින් පළාත් සභා ක්‍ර‍මය සංශෝධනය කිරීමට ඡන්දය ප්‍ර‍කාශ කර, තම ජීවිත කාලය තුලම ‘පළාත් සභා අහෝසි කිරීමේ ව්‍යවස්ථා සංශෝධනයකට‘ ද මුහුණ දිය හැකි වනු ඇත.  දිනේෂ් ගුණවර්ධන හෝ විමල් වීරවංශ වැනි අයෙකු නොව සරත් වීරසේකර වැනි මන්ත්‍රීවරයෙකුට වත්මන් පාර්ලිමේන්තුවටම පාර්ලිමේන්තු 2/3 බලයෙන් පළාත් සභා අහෝසි කිරීමේ යෝජනාව ඉදිරිපත් කරනු ඇත.

1982 කුප්‍රකට ‘ලාම්පු කළගෙඩි සෙල්ලම‘ දී පාර්ලිමේන්තුවේ විපක්ෂ නායක ධූරය දැරුවේ ඒ.අමිර්තලිංගම් ය.  ජනමත විචාරණය පරාජයට පත් වී පාර්ලිමේන්තු මැතිවරණයක් පැවුත්වූයේ නම්, අමිර්තලිංගම් ට විපක්ෂ නායකත්වය නැතිවී එය ශ්‍රීලනිප ට හිමිවන්නේය. අමිර්තලිංගම් තමාට වඩා රට යැයි සිතා ‘කළගෙඩිය වෙනුවෙන්‘ උතුරු නැගෙනහිර පළාත් හි මැතිවරණ ව්‍යාපාරය මෙහෙයවා ඒ පළාත් හි ‘කලගෙඩිය‘ දිනෙව්වේය.

විපක්ෂ නායක සම්බන්ධන් සහ සුමන්දිරන් ට අමිර්තලිංගම් මෙන් කැපකරන්නට දෙයක් නැත!  නමුත්, පළාත් සභා ක්‍ර‍මය රකින්නට ඔවුන්ට වගකීමක් තිබේ. එසේ නොමැති නම් ඔවුන් සියල්ලට එකවර ‘උතුරේ ද දකුණේ ද බලය බෙදීමට පක්ෂ ජනතාවගේ ද්‍රෝහීන් බවට‘ පත් විය හැකිය.

කොළඹ තානාපති කාර්යාල, ජාත්‍යන්තර සංවිධාන, ඉන්දියන් ඔත්තු සේවාවන්ගේ ‘කනෙන් රිංගා පළාත් සභා අහෝසි කිරීමේ පළමු පියවර දැන් කරළියට පැමිණ ඇත. ද්‍ර‍විඩ ඩයසපෝරාව හෝ මේ ‘ගුග්ලි පන්දුව‘ තවම දැක නැත. ප්‍ර‍තිචාර දක්වා ද නැත!

2/3 ක බහුතරයකින් 20 සම්මතවීම යනු පළාත් සභා ක්‍ර‍මය පාර්ලිමේන්තුවේ දී අහෝසි වීමේ පළමු පියවරයි.  නාමික වාමාංශිකයින් ද, ටීඑන්ඒ සහ මනෝ-හකීම්-බදුර්දීන්-තොන්ඩමන් කණ්ඩායම් වෙත ද අවබෝධ කර දීම අනුගාමිකයින්ගේ ද, පාක්ෂිකයින්ගේ වගකීමයි. යහපාලනයෙන් මුසපත්වී බොරුවට නිදා සිටින සිවිල් ක්‍රියාකාරිකයින්ගේ ද, යුතුකමයි!

රජිත් කීර්ති තෙන්නකෝන්
කැෆේ සංවිධානයේ විධායක අධ්‍යක්ෂ

(Visited 9 times, 1 visits today)

කාටූන්

ජයාරූප